Taringot tu RAJA BIAKBIAK

 Ia Raja Biakbiak margoar do huhut Raja Gumelenggeleng na songon gumul do ibana ndang mar pat jala so boi hundul.Ibana do na lumea di bagasan di bagasan rohana: ala so martihas angka anggina.
Mangihuthon baritana:ro do sahali Mulajadi Nabolon,tuat tu sianjurmulamula sorang tu Guru Tateabulan mangunjuni rohana;ai dipangido ma anakna Sariburaja seatonna.
"Ba saguru di ho do Ompung!" ninna Guru Tateabulan mangalusi.
Umbege i,didik Raja Biakbiak ma tu inana; "O inang! hubege di oloi amanta nangkiningseaton ni Ompunta Mulajadi Nabolon si Sariburaja,ianggo di rohakku,ahu do nanaeng seatonna.ai aha ma au martimbangkon
Sariburaja na so martihas i?asa ianggo siat pangindoaku suru ma damang manabunihon au;ai atik pesongon on partubungku au do si pultak bajubajum!"
Umbege hata ni Raja Biakbiak inana i,di suru ma Guru Tateabulan manabunihon Raja Biakbiak tu dolok Pusukbuhit.

Dung nakok Mulajadi Nabolon tu bagas,di pangido ma Sariburaja seaton na.jadi dileon inana i ma.

didok  Mulajadi Nabolon;"tiop ma pat na i!" jadi di tiop ma tutu.dung i di seat ma jala ditanggoi.

nunga di hodohon hian pangalopaanna.ia dung sidung di tanggoidi pambahenma tu pangalopaanna i asa pamasahonna.

Dung ro dipangalopaanna i,manggorama Mulajad Nabolon didok ma; "Na olo gabe Sariburaja,ruar ma ho sian i!" jadi mangakkat ma tutu Sariburaja sian ni,laos hundul ma ibana tu halangulu.nunga songon garaga ibana,songon gurugu,nasada songon na pitupulu.

mangihuthon pandok ni na deba,sian angka na tinggal i laos manjadi ma ragam ni pahanpahanan.

ia di tingki na laho mulak Mulajadi Nabolon tu banua ginjang,sian dolok Pusukbuhit do Ibana manaek.jadi jumpangna ma disi Raja Biakbiak;"ise na mamboan ho tuson.?"ninna Mulajadi Nabolon manungkun ibana.

"ianggo i da Ompung,na mabiar do au di biarhu,matahut di tahuthu! hubege nakining diondam Ho da Ompung seatonmu Sariburaja,anggo di rohaku ahu do nanaeng seatonmu;alana martihas i au.gabe hu pangido tu dainang  asa disuru damang manaruhon au tuson.ai ahu do sipultak bajubaju ni dainang."

"Ba naeng marsomba tu ho di roham angka pinompar ni anggim dohot ibotom.?" ninna Mulajadi Nabolon.

"Naeng ma tutu,ia ahu do sihahaan,ahu do na patut raja nasida!" ninna Raja Biakbiak.

"Antong molo songo i,beha,olo do ho tumpaonku?" ninna Mulajadi Nabolo.

"Ba olo do ahu,asal ma marsomba tu ahu angka pinompar ni anggiku dohot ibotokku!"ninna Raja Biakbiak.

 Jadi di tumpa Mulajadi Nabolon ma Raja Biakbiak di dolok Pusukbuhit i.gabe marpat,martangan,alai songon munsung babi (santabi) do munsungna.

mangihuthon pandok ni na deba marhabong do Ibana.dibahen ma goarna Tuan Raja Uti;raja na so ra mate,raja na so ra matua,sian punsu ni dolok Pusukbuhit i.di pahabang Mulajadi Nabolon ma Ibana tu ujung Aceh (barita ni Raja Uti sinurathon di buku na asing).

         oleh: H. NAINGGOLAN.
                 01-03-2015